شو بدّو الحزب؟حدا يفهمّني شو بدّو الحزب؟
شو بعد بدّو بالاصح، ليقتنع الحزب وكل مين شدّ على مشدّه، إنه لبنان تعب؟شو المطلوب من هالبلد يقدّم بعد؟ شو المطلوب من الجنوب وبيروت والبقاع والبحر والجبل والحجر والبشر
يقدّموا بعد؟
اولادن؟ بح
بيوت مهدّمة؟ done
ناس مشرّدة؟ ذكريات ممحية؟ شجر وقلوب محروقين؟ موج بلون احمر؟زيتون صار حافظ صوت القصف أكتر من صوت الهوا؟ آثارات عمرها الاف السنين ما بقي منها أثر؟ كله تم وحصل.
قلتوا حملتوا سلاح لتحموا لبنان…طيب مين بيحمي لبنان من السلاح؟مين يحمي الأمهات من الخوف والأطفال من الرعب؟ مين بيحمي البحر من الحزن، والزيتون من النار، والبلد من الخراب المتكرر باسم “النصر”؟
لبنان مش مزرعة حدا. ومش ساحة لتصفية حسابات إيران ولا غير إيران.
لبنان وطن… وطن ناسه تعبوا، انكسروا، وجاعوا، واندفنوا تحت الركام. وطن فيه احلام بدها تتحقق، وما بدها تصير خبر عاجل كل يوم.
وطن بدّو يعيش بينما الحزب بعده مصرّ يجرّه من حرب لحرب وكأنّ أرواحنا تفاصيل صغيرة بمشروعه الكبير.
شو بعد بدّو الحزب منّا؟
شو بعد لازم نخسر؟
بيوت الجنوب؟ انحرقت.
بيروت؟ انكسرت.
البقاع؟ مخنوق.
الاقتصاد؟ مات.
الشباب؟ هاجروا.
والناس؟ عايشة على أعصابها، ناطرة الغارة الجاية وتحذيرات افيخاي الجاية، والخبر العاجل الجايي.اللي بحب الجنوب ما بيحرقه و بيحوّله خط نار. واللي بيحب لبنان ما بياخده رهينة لمشاريع الخارج. واللي عنده ذرة ضمير، ما بيقرر مصير شعب كامل من دون ما يسأل إذا هالشعب بعده قادر يتحمّل. اللي بحب الأرض، بيحمي زيتونها الاخضر، بيوتها القرميدية، بحرها الازرق ، شطوطها الذهبية، آثارها التاريخية ، ذكرياتها، مجدها ناسها، ضحكها، احلامها…
شو بعد بدّو الحزب ؟ شو ؟؟؟؟؟شو بعد لازم ينهار؟ ما عاد عنا الا شويّة كرامة معلّقة بخيط رفيع. ناويين تقطعوه؟
تعبنا من شعاراتكن.تعبنا من نصركن اللي كل مرة بيترك البلد أنقاض. وتعبنا من وطن عم يندفن شوي شوي تحت اسم مقاومة .
عن جد…خلص. خلللللللللص.
نحنا بدنا نعيش. بدنا دولة، مش دويلة.
بدنا سلام، مش شعارات.
بدنا مستقبل، مش جنازات.
بدنا نربّي ولادنا ونفرح بشهاداتن العلمية، مش بشهادة وفاة.
وإيه، إذا السلام الحقيقي بيجي عبر اتفاق بيحفظ كرامة الناس وأمانهم ومستقبلهم، نحنا مع السلام، لأنّ الشعوب ما بتعيش على الخطب والحماسة. الشعوب بدها كهربا، مدارس، بيوت، شغل، وضمان إنّها ما تفيق كل يوم على حرب جديدة.
وبدّكن اكتر من هيك؟ ايه نحنا مستعدين نوقع معاهدة مع الشياطين، اذا المعاهدة بتضمنلنا السلام والامان والمستقبل و… اوعا حدا يقله عقله يقلنا انو اسرائيل الشر المطلق وما بتلتزم بالمعاهدات. دخلكن من وقت معاهدة السلام مع مصر، صار ضربة كف بأم الدنيا؟ أم إنو الحلال على غيرنا حرام علينا؟ خلص بقى. عن جد خلص.
لبنان ما عاد يتحمّل بطولات على حساب شعبه. حلّوا عنّا… واتركوا هالبلد يلحق يعيش . حلّوا عنا بقى، حلّوا عنا بقى، حلّووووووا وليحلّ السلام.
جوزيفين حبشي
